領導

葉劉可能選特首，聽眾打去電台話寧願移民返美國。不過如果將曾蔭權、陳方安生與葉劉淑儀放在一起，又如果巿民有份選特首的話，葉太不是沒有支持者的。

曾蔭權古惑，陳太趁勢投機。葉太雖然23條衰左，但係她的工作能力一向備受前下屬讚賞，算係一敢做敢說的女子，烈女形象比陳太過之而無不及，又與中方關係良好，實能硬碰一場。你睇曾鈺成趕出來攬住葉太用黎打曾蔭權，就知葉太幾有號召力啦。

之但係根據跑馬仔既現況，香港要靠三個前政府高官爭，民間的政治人才何來﹖又唔知呀民建聯政治助理做成點，呢呵﹖

***

員工，其實係需要一個強政勵治得黎又有料既上司／領導。如果領導人只能強政而無法勵治，吹完水無抹咀，留下爛攤讓下屬收拾妥貼，領導卻自己風騷領功，咁，員工係會崩潰既。

正如細個果時成日問李太，點解成日淨係叫我洗碗掃地唔叫細佬做，佢會話梗係搵個信得過既辦事啦。（唔，細佬唔響香港，搏佢唔睇呢到。）咁即係話，辦唔到事既人就成日都唔洗辦事啦。個邏輯唔啱喎。

教員室小圈子最近討論的一個話題，就係點解工作時常落在某些同事身上；而辦公室，尤其係對我黎講價值不高既學校辦公室層級黎講，升唔升職根本唔重要，薪級照跳。咁做一班做得野而又要揹野既教職員黎講，除左對得住天地良心，同自己忍唔到頸要出聲之外(仲要引來殺身之禍)，有咩意思呢﹖我地呢幾日悟出，扮蠢同無知，係生存之道黎嫁。

雖然，我知，我係唔會變嫁啦。

***

而響呢D時候，我都想體驗吓葉劉做領導既氣勢同指揮囉，如果佢真心有一套治港藍圖既話。

發展係需要藍圖，而唔係吹水囉，呵﹖