2006年8月21日

笨者,更抵打!

要打擊一個人不一定要打,古語云出手只是下三濫功夫。在這個年代還用著蠻荒行徑消滅敵人,主使者不是解決問題智慧與想像力有限,也高估了香港對暴力的容忍。

昨夜看新聞之時,就是覺得主事者笨得要命。不見得會有香港人因保釣事件打何俊仁,因為政治不正確。反之寄恐嚇信到日本抗議者則有。因銷售稅打何者也不大可能,否則嫻姐田少也要被人打。利用暴力對抗異己只會增加對手所得之同情分。你看連快人一步的劉江華與慢兩拍的曾蔭權都要搶探何俊仁,就知此事能撈上多少政治本錢。無需大義凜然讉責暴力,主事者連公關都失分。

究竟誰主使毆打何俊仁,報紙破案快過警察。如果報紙猜測之澳門幫屬實,此有錢佬(或其馬仔)用土豪劣紳式風格辦事箇然嚴重影響香港之亞洲國際都會形象。政府破案與否亦叫曾蔭權頭痕。大家心知肚明,事件又不了了之﹖

9 則留言:

CK 說...

有時覺得中國人既有錢佬特別爛,係黑社會抑或高尚既所謂上流社會,現在已越來越模糊了。

中國人,有時就係咁唔爭氣…

Eric Spanner 說...

有問題問!

若然係咁,點解依然重有一堆人時不時出來喊打喊殺,甚至今次出事之後,都有部分人拍手叫好?似乎呢類言論,重有一定市場。

(重有少少發現:(一)對比古今中外其他地方,香港o既政治暴力行為比較少,其他類型就……唔會特多亦唔似特少。(二)對政見反應最敏感o既報界同網上輿論界,前者可能生意o係手,似乎唔多輕舉妄動;拍手叫好o既,係班網上憤青。)

匿名 說...

曾特首都話要去「天涯海角」足拿真凶,是否暗示他也認同報紙所說黑手其實不是香港人而是外地(eg. 澳門)人呢?

Nelson 說...

若是政治尋仇,打人冇分,打死人才得分。若是商業糾紛,則不失為一有用的方法,不是每一個人都像miss lee這麼有正義感,支持自己的親人被打,總有老婆老母老父老友勸事主放棄。另一方面,主事打人者也許不為阻止何俊仁做任何事,明知何俊仁不會退縮,只想打鑊金過佢過下癮,出下氣,不打白不打,打人的成本對某些人並不高。要有權而不用,談何容易。

MissLee 說...

我覺得響香港喊打喊殺係會有一班支持者!就好像肥力講既網上憤青,甚至以前學校的學生,見到有人失態係唔會替人不安卻開懷大笑仲話你好鬧佢無同情心。我一向都不明白這班人的心態,無謂浪費時間為他們找原因。但係會有班咁既人囉。

喂,Nelson,我邊有支持自己親被人打﹖不過我想這班人有沒有計算過打何俊仁的後果,如你所說,打完佢都唔會退縮,完全達不到打人的目的。以見到別人的不幸為樂,就好似肥力上述講那班完全不可理喻的人。但係為何要將自己的過癮建築在別人的不幸上呢﹖

ck,有時我都唔想一頂大帽蓋下去的中國人唔爭氣,我諗個個國家都有些蠻不講理的人,但不文明的事發生在中國甚至香港身上,真教人特別人心痛。

不過各位,今日何俊仁又無點明係澳門幫做噃。唔通佢想轉移視線。五師兄,天涯海角都可能係香港沿海咋!

Eric Spanner 說...

我估nelson有少少typo o者,應該係「支持自己被打o既親人」。

至於叫好,我以為,一係黑心,二係之前認定被打o個班係衰人,所以對衰人點衰點賤點殘忍都得——呢個亦可能係熊一豆o既「涼薄發現」o既原因之一——睇怕佢o地心目中好難有量刑o既諗法。

再講講第二點先。自以為過去十幾年,或者更耐,政見呢家o野,不論係民主專制好,加多o的福利或削福利好,或者其他o野好,往往同道德扯埋一舊,支持乜意見都有機會俾人話你大奸大惡不可饒恕。做o左奸人,一班人心目中只得個「奸」字,重會當個「奸人」係「人」咩;於是先喊打喊殺,跟手就郁手郁腳矣。

Nelson 說...

多謝Eric幫手解話,意思的確是「支持自己被打的親人繼續做xxx」。

何俊仁唔縮,但大把人縮,正因先前打殘左幾個,否則都輪唔到何俊仁接十姑娘單官司。

我們都是沒有能力調動武力的人,當然不會崇尚暴力。

你我若有死亡筆記在手,做的可能也是一樣。

MissLee 說...

又係自己發雞瘟無思考各種可能性!致歉!

今日才看到龍應台以前一篇文寫︰[所謂公民意識,不過是意識到自己和別棲息在同一株大樹上,不得不關心下面那主幹究竟發生了什麼事,因為不關心的結果可能是大樹轟然倒下時,還以為自己那一支照顧得蔥綠可愛,挺有成就感]。

另一段則寫︰[凡是打著民主旗幟的反對者,越是受當權者打壓,越容易得到人民的精神支持,越是突顯出自己的道德光環,人民的支持和道德光環,又往往使得這使民主派反對者自覺自己是站在歷史正確的一方] --> 所以我最怕有人出來喊反暴力 -->反暴力只是增強自己勢力的口號,並且自我麻醉,簡化事情。我們的泛民主派不是這樣嗎﹖

方潤 說...

1. 如果有下文,應該就係打佢屋企人。
打死你你都唔驚,但係打你屋企人你就會驚。

當然,幕後黑手敢唔敢再賭一鋪就冇人知。尤其佢呢幾年成日都開錯盤口……

2. 所謂泛道德化,根本唔係近幾十年,而係中國既「優良」傳統。就是柏楊所講既「君子小人」,只要將自己劃為君子,對方劃為小人,就立即勝利了。
我們從來沒進步過。