閒聊

(一)

只有青春無敵，才有資格將中文講得像英文。因為只有少不更事，才覺得英文腔的中文很可愛，而不怕被人暗笑扮野，或者讓如我等無聊人擰歪面偷聽兼記錄。

「你sh想唔sh想去呀﹖」

「果個人真係好ch寸呀。」

「ah-(k)-ha，好啦，bwai bwai。」

我清楚，因為我都係懶係將中文講到似英文的人。

(二)

我一向說話都好大聲。教書還好，示威也行，但坐辦公室就很尷尬。我盡量把聲音壓下去，不過積習始終難改。

而當我好溫柔好女人咁對電話講︰「喂﹖」 - 半秒後，來電的相熟朋友，都會 - 冷笑。

(三)

老豆食飯時會無端端唸詩。

佢話︰「十年生死兩茫茫，不思量，自難忘。千里孤墳，無處話淒涼。」

我答︰「小軒窗，正梳妝。」

佢話︰「未到呀，嘈嘈嘈。」

之但係佢又背唔到落去噃。

佢繼續背︰「故人西辭黃鶴樓，烟花三月下揚州。」

我答咀︰「孤城遠影碧空盡，唯見長江天際流。」

佢鬧︰「錯囉，孤帆呀，低B。」

我問︰「明月夜，陶醉了。呢句詩係邊個作既呢﹖」

佢諗左陣，好苦惱咁答︰「唔知喎…」

我答︰「張學友囉，哈哈。」

(我後來在網上搵，都搵唔到點解我個腦有呢句，連個旋律都有埋喎~~)