2006年1月29日

好狗年

小時候,那有年初一下午便能安坐家中的可能。 那年頭,不是在街上拿著一袋二袋賀年夏威夷朱古力在撲的士挨家挨戶拜年,便是賴死在親戚家中看大人打麻將然後自己無無聊聊坐在沙發上等呀等,連娛樂版都刨埋,等到晚上七時八時傭人便走過來問你吃蘿蔔糕否。「唔食」,李小朋友通常黑著臉回答,當然也有說謝謝,不過無聊與無助感已打敗了禮儀與體面,所以以前我逢年初一都俾人鬧。 逢年初一最怕說恭喜發財龍馬精神一本萬利身體健康之類的話,所以初一早上起床便開始神經緊繃,迫著開始一天的恭賀新禧話劇表演,利是錢也利誘不到我以平靜和諧的心情說兩聲意頭話。李老闆逢初一都要打電話到外國向親戚拜年,在李小朋友還沒有心理準備下突然傳電話過來︰「你等等呀吓,呀女話要同你講兩句…」唯有乾笑兩聲,用非常生硬的語調同姨媽姑姐拜年。 今時唔同往日啦,早幾年傳統已經衰落。莫講話長者們,見上帝者見上帝,移民的移民,李老闆今時今日都唔打電話,改用SMS拜年︰「呀女,字母要轉做大楷,點轉﹖」到我還是戰戰兢兢問李太,初幾先可以去街,李老闆竟然初一晚就去打麻雀!咩傳統都無晒,李老闆,攪到我媽媽聲,當然只可在心裡咆哮,否則仍會被「開年」。 飲完茶搭車返歸,我問李太︰「你點過渡三十歲的危機﹖」答曰︰「三十歲果陣,我咩都有啦,結左婚,你都幾歲咯,危咩機…」可憐我快三十,快者,不過今年過埋生日都未三十呀吓,仲係裙腳妹囉。由此悟到,未有自己的家庭,更不用說生了兩件要抱來抱去拜年逗利是,新年氣氛就梗淡薄點。所謂節日氣氛,事在人為囉,今晚我同李太同細佬響屋企食白切雞,呵呵。

21 則留言:

日不落 說...

已經唔係好記得以前初一點過,因為最記得o既係:好幾年的年初一都同屋企人打下衛生麻雀,咁,好幾年的年初一都有多幾十至百零蚊洗下囉,就係咁,嘿~

咦,又係我第一個留言,後面有人係哼哼聲,話:攪錯呀,爭住......

車,理得你~

MissLee 說...

哈哈哈,我今朝好似早過你響某人到留言喎~~yeah~~~咁你今年有無賺左幾個零頭洗下咁呀﹖

日不落 說...

噢……問題係:我無諗過係某人個度留言喎~~~(後面又有人哼哼聲~~~)

今年賺幾多?噢,無謂講啦,費時又聽到哼哼聲,呵欠~

華利 說...

missy,我好有興趣知道,你細個時個傭人係咪個啲姐」?而家再上個親戚屋企,有無變咗做菲/印/泰傭?

華利 說...

更正:係咪個啲「馬姐」

匿名 說...

還未30!miss 你個(9x新亞新聞) 頭牌都9到好盡bor!
仲估你係張宏艷果期添。
不過教書行業都幾高危,唔覺意、唔覺意就斷送了青春。小心。

金子

MissLee 說...

係呀,細個見親都係馬姐,佢地而家退晒休囉,無七十都八十,我細個果陣時佢地都應該有六字頭,我初中開始佢地就陸續退休。佢地好勁,唔單止識整蘿蔔糕呀年糕呢d,仲識整香橙蛋糕呀ok汁雞翼咁。

好傳統嫁,我,而家咁大啦至識咩叫外傭!

金子,都唔係好盡喎,9x幾入學,唔係咁寫咩﹖

匿名 說...

9x幾入學,唔係咁寫咩﹖
------------------

係....

^^

sunfai 說...

有小朋友, 佢學校又會早兩個禮拜開始講啦, 做家長又會為小朋友突登安排一些節日嘢啦....... 同埋細路哥, 乜都覺得新奇, 新年印象自然深啦。

不過好似小弟的'大家庭', 由於老人去的去、又或年事甚高, 已無復'當年勇', 氣氛大不如前了.......

chanchan 說...

教書呢行時間真係過得好快,日子逐年係咁數,青春真係斷送得好快!!

咁祝miss lee 青春無敵啦!

sf 說...

人家9x某系, 是指9x年某系畢業. missy你都鬼馬勒, 咁樣報大數.

講起新年氣氛, 當鋪頭越來越早開市,我們的農曆年假期越縮越, 咁, 重氣咩野氛姐.

Kursk 說...

古人說三十而立....可是三十將至, 只有破, 不見立。拜年也不知如何面對江東父老。

YYL 說...

新年流流幹嗎大家就密使李大人的年齡秘密投石問路一番?^ ^

仲有3個半鐘先開飯,個廳又成班親戚,神啊!請不要給我多一點時間!>_<

chloris 說...

我自從98年整親隻腳後, 都無乜拜過年
Ms Lee Lee 的芳齡唔係重點
佢派利是未先係重點......
唔該預留一封利是吖!!

MissLee 說...

打劫呀!有老師趁火打劫呀!呀何老師,應該你派利是快過我喎!

船山兄,不是報細數扮細路才有問題嗎﹖以我17歲的臉孔(呵呵~~)我成日以為報大數無問題~~~

Kursk兄、YY兄,我幾多歲都無所謂,總之而家見親朋戚友,唔會再有人問我何時出閣,才是總點…可悲的新春啊…

chanchan兄,你望住細路大,時間過得仲快。趁青春,留倩影啊!

過路小M 說...

超級好無意咁黎到你個blog, 睇到9x新亞同埋接近30呢d字眼,就好似大陸睇到六四一樣咁敏感,so, 覺得呢個年初二同你幾有緣,咪留個言。

我會一路睇返你d blog!

有機會交流下丫!

my email: cclam26@alumni.cuhk.net

jim 說...

年齡唔係問題,心境最重要。祝Ms Lee心想事成,繼續精靈。

同事閒人 說...

同事你真好彩,出生於大家族的我年年都逃不過你文中提及的精彩節目。由年初一開始做pr,十個話題九個廢,莫講三十歲,我想到我四五十歲都走唔甩!望著成屋”親戚”,諗起年前一齣”豪門夜宴”,人來人住,能正確說出我名字的不到十人,相反,我亦不太暁得各人是誰!

又,巧合地,我媽前天亦跟我說她像我這年紀時已是一個持家有道的賢妻良母,觀乎小妹子至今仍一事無成,感慨萬分!

Duke of Aberdeen 說...

新春大吉!

MissLee 說...

喂同事,新年進步!我本來都是大家族啊,只是歲月催人,花果飄零啊!

我也恭祝你新年進步啊!

小M,你咁直接既﹖我怕羞喎!你邊處嫁﹖多來坐坐啊!

Frostig 說...

Kung Hey Fat Choy!
I miss those days when I could visit the friends and relatives Ar!!!