吉

李太投訴今年報紙和屋苑送不夠揮春，懷疑經濟不景，商人縮皮。依往年通常是報紙雜誌(特別是蘋果和壹仔)、銀行和某幾間保險和地產公司送揮春的慣例看來，推斷這些行業或商號經營困難，也不無道理。今早見蘋果話送麥兜扮老虎(點解唔係扮狗﹖)的海報，立即左翻右揭，原來印了在A24版，色水同獨立海報差咁遠，當然無留到啦。 *** 昨日見到有酒家推出鮑魚蘿蔔糕，完隻鮑魚放在又圓又白的蘿蔔糕上，又有人加入魚翅和燕窩炮製「超級至尊蘿蔔糕」，酒家還興致勃勃，我就覺得折墮到暈，唔知食緊蘿蔔定鮑魚。蘿蔔講求清甜，鮑魚根本就無味道，李老闆話全靠打個茨汁，兩樣野咁溝，為豪氣而豪氣，你估香港仲係國內同胞要食十幾萬一餐團年飯咩，港燦呀港燦。 抄段陳雲在《五星級香港》講香港旅遊業時，論及盆菜宴作為香港特色菜︰ 「民間方面，早陣子流行吃新界客家菜農村的『盆菜』，在文化創意上也是差強人意。『盆菜』本是把豬肉和雞鴨肉和鹹菜豆腐一層層放在木盆裡，在祭禮之後眾人用筷子在盆中夾食的農家粗菜。若是推行得當，『得時』和『得地』(注意時節和地點)，適當轉化其文化意義，本來可以成為民俗食品…但是缺乏文化想像力的鄉村食店和新界茶樓，走不出奢侈化、貴格化和精緻化的商業路子。今日的盆菜用料，有鮑魚有翅，無疑是矜貴了，也乾淨衛生了，但文化內容慘淡貧乏，沒有知識和創意，金錢買不了文化，反而糟蹋了文化。精神的貧窮，正是現代華人社會的悲哀。」 此乃作者在2000年的感想，套在今天，仍然受用。習非成是，還洋洋自得，文化之沒落也，哀哉，噢，唔係，掌咀，應該恭祝各位萬事如意，身體健康!